யாழ்ப்பாணத்தை சேர்ந்த இளைஞர்கள் உக்ரெய்னிற்கு எதிராக போரிடுமாறு நிர்ப்பந்திக்கப்பட்டுள்ளனர் என வெளியான தகவல்களை இலங்கைக்கான ரசிய தூதரகம் மறுத்துள்ளது.
பிரான்ஸ் பெல்ஜியத்திற்கு செல்ல முயன்ற யாழ்ப்பாணத்தை சேர்ந்த இளைஞர்கள் உக்ரெய்னிற்கு எதிராக போரிடுவதற்கு நிர்ப்பந்திக்கப்பட்டுள்ளனர் என குடும்பங்கள் யாழ்.ஊடக அமையத்தில் பகிரங்க குற்றச்சாட்டுக்களை முன்வைத்திருந்தனர்.
இதனிடையே போரில் ஈடுபடுத்தப்பட்டுள்ளதாக கூறப்பட்ட இளைஞர்கள் இராணுவ உடையணிந்து பேசுகையில் இரசிய இராணுத்தில் இணைக்கப்பட்டு, உக்ரெய்னுக்கு எதிராக போரிடுவதாக கூறியிருந்தனர்.
எனினும், இதனை முற்றிலும் மறுத்துள்ள ரசிய தூதுரகம், அவ்வாறான தகவல்கள் ஆதாரமற்றவை மற்றும் அடிப்படையற்றவை என்றும் கூறியுள்ளது.
எங்கள் நாட்டிற்கு வருகை தரும் அனைத்து வெளிநாட்டவர்களையும் ரசிய அதிகாரிகள் மதிக்கின்றனர். அவர்களின் தகுதிக்கு ஏற்ப வேலை வாய்ப்புகளை வழங்கவும் தயாராகவுள்ளனர்.
மேலும், ரசியாவில் தங்கியுள்ள இலங்கையர்கள் தொடர்பான விடயத்தினை மொஸ்கோவில் உள்ள ரசியாவிற்கான இலங்கை தூதரகமே கையாள்கின்றது.
மேலும், மோசடியான முறையில் இலங்கையர்களை ரசியாவிற்கு அனுப்பும் முகவர்கள் குறித்து தூதரகத்திற்கு எவ்விதமான தகவல்களும் கிடைக்கவில்லை.
எனினும், குற்றச்சாட்டுக்கள் குறித்து இலங்கை அரசாங்கத்திடமிருந்து உதவிகள் கோரப்பட்டால் அதற்கு தேவையான உதவிகளை வழங்க தயாராக இருப்பதாக தெரிவிக்கப்பட்டுள்ளது.
